اهو جه يا ولاد

Friday, May 2, 2008

تسلم لى دماغك يا كبيير

السلام عليكم ورحمة الله
الاضـــــــــــــــــــــراب
مش عارفه ابدا ازاى
ولا اقول ايه
فرحانه ان الشعب بدأ يفوق
وخايفه من اللى ممكن يحصل
دا تانى اضراب هيحصل فى اقل من شهر
قعدت احدث نفسى
انت زعلانه ليه؟ مش كنتى نفسك الاخوان يشاركوا فى الاضراب اللى فات؟
قلت فعلا
ولكن سبحان الله
اتضحت الرؤيا لدى
حزنت جدا بعد تراجع الاخوان عن الاضراب الماضى
وعبت على جماعة الاخوان انها لم تشارك الشعب فى هذا الامر
ولكن فعلا انا انظر لشىء وجهة لوجه
اما فوق
او مكتب الارشاد او ما الى ذلك
فهم ينظرون للامر نظره شامله
يحطوا به من كل جوانبه
قلت لعلهم لم يضربوا لكى يعرف الشعب والحكومه دور الاخوان----
فاذا شارك الاخوان فى الاضراب لن يشاركوا وحدهم بل سيقودوا معهم الكثير
فهم مصدر الثقه الوحيد الان لدى الشعب المصرى

قلت لعلهم ايضا ارادوا ان يعرفوا بداية من لديه القدره على الاضراب---
كم سيصل عدد المضربين
وتأثير الاضراب

قلت ربما ايضا ليثبتوا انهم لا يخربوا ولا يفسدوا----
فها هم لم يشاركوا ومع ذلك خربت محلات ومدارس وما الى ذلك
فكثيرًا ما ضحى الاخوان تضحيات جسام؛ ليحصد خصومها وخصوم الدين ثمرتها.. ويذوق ابناء هذه الجماعه الويلات على أعواد المشانق وفي المعتقلات وفي منع دعوتهم بالقوة..

هذا ما دار بخلدى بعد الاضراب الماضى
ولكن ماذا سيحدث غدا؟؟
الله اعلم


يا ترى تتوقعوا ايه اللى هيحصل؟

المهم
منذ عدة ايام جائتنى هذه الرساله
بسم الله الرحمن الرحيم
تصريح صحفى من المرشد العام بشأن إضراب 4 مايو
صرح الأستاذ محمد مهدى عاكف المرشد العام للإخوان المسلمين بأن الإخوان المسلمين ضد السياسات العامة التى تكرس الفساد والاستبداد وأن الإخوان مع ضرورة أن يكون الشعب إيجابيا تجاه هموم وطنه حيث أن الإصلاح السلمى يتحمل تبعته الشعب المصرى كله وكافة قواه الحية .
ويرى الإخوان المسلمين أنهم مع حركة الاحتجاج السلمى التى تطالب بحل الأزمات ومواجهة الأوضاع المتردية التى يعانى منها الشعب .
ولما كانت السلطة التنفيذية قد أصمت أذنيها وأغمضت عينيها أمام كافة دعوات الإصلاح، فإن الإخوان المسلمين يتجاوبون مع الدعوة إلى التزام المواطنين بيوتهم يوم 4 مايو القادم وتستثنى من ذلك الفئات التى يتوقف عليها صحة المواطنين والامتحانات ومرافق الدولة الحيوية .
ويؤكد الإخوان المسلمين أنهم ضد أى مساس بمؤسسات الدولة أو الممتلكات العامة والخاصة، وألا يؤدى الاحتجاج السلمى إلى أى نوع من الفوضى .

القاهرة فى : 23 من ربيع الآخر 1429هـ
29 من إبريـــل 2008م



لا تتخيلوا كم السعاده الذى شعرت به
لم يتفوه لسانى الا بكلمه واحده
تسلملى دماغك يا كبير
كل يوم يزداد حبى وتقديرى واعجابى بهذا الرجل الصالح
نحسبه كذلك ولا نزكى على الله احد
=====
عاوزه اعرف رأى حضراتكم فى هذا الاضراب
ومدى اتفاقك مع فضيلة المرشد فى قراره؟
وهل هو قرار صائب ام لا؟


وكل سنه وانت طيب يا ريس


-------------


ملحوظه


حديثى عن عدم مشاركة الاخوان فى الاضراب الماضى


ما هو الا راى انا الشخصى


اى انى لم اعلم ما حقا لماذا تراجع الاخوان عن الاضراب






======

10 comments:

محمد فوزي said...

لا انا من رأيي إن الموضوع مش كده

في المره الأولى الإخوان امتنعوا عشان مكانوش هما المنظمين , اللي هيقودوا الناس نحو التحرر ,

بالظبط كده زي ما حضرتك قولتي قضية مين بيزرع ومين بيحصد
ومين بيبروز نفسه عشان يبان

إنما لما لقوا إنهم فقدوا جزء كبير جدا من شعبيتهم واحترام الناس ليهم
وشكلهم بقى وحش فقرروا يشاركوا في المهزله اللي الجايه دي

بس شكلهم بقى أوحش

وانا بقولها من عند الإخوان وأمري إلى الله

أنا ضد الأضراب

مدون ضد الإضراب

وعايز أقول حاجه تانيه كمان

أرجوكم اتقوا الله

الأمر خطير مش هين أبدا
بطلوا استخدام الألفاظ الكبيره
غدا سينجلي النهار
وسيعذب الله المتجبرين
ونهاية الظلم اقتربت


اللهجه دي مدمره وهتودي البلد في داهيه

أرجوكم مش عايزين بلدنا عراق جديد

أرجوكم إعقلوا الكلام قبل ما تكتبوه

وكل واحد يفكر كده الثوره اللي ممكن تدمر وتحرق وتخرب دي ممكن تؤدي إلى نهضه إزاي


أعتذر ,وأتمنى أن نفكر لا أكثر

ووالله كلنا بنحب مصر بس مش لازم نبقى زي الدبه اللي قتلت صاحبها

وفقنا الله وهدانا أجمعين

إخوانى حتى النخاع said...

السلام عليكم

فينك من زماااان ؟؟

المهم ... انا هقولك رأى الاول فى إضربا ستة إبريل وإضراب أربعة مايو


فى إضرب ستة أبريل مكنتش ليه ملامح كاملة....

دا الإخوان مشاركوش فيه والحزب الوطنى اتهمه بإنه الى الإخوان وراء الخراب بتاع المحلة

يبقا لو شاركوا؟؟؟؟

انا معاهم جداااا فى إنهم مشاركوش فى ستة إبريل

ومعاهم جدااا إنهم هيشاركوا فى أربعة مايو .. لأنهم قالوا أقعدوا فى البيت

فقطعهوا على الحكومة إثارة الشعب

وانا والله كنت زيك فرحاااان ججدااا
والله كنت برقص فى البيت
هههههههههههههههههه

وأمى طبعاااا كانت زعلانة ( كانت بتقول دا غحنا كنا لسا طالعين من المحليات .. هندخل على اربعة مايوو ؟!! طبعااا علشان الحاج الوالد )

بس طمناها الى إحنا مش هنخرج

واهو .. فاضل يوم

تشكرىى للبوست دا

أخوووووووووووووووووكى

باجوجو said...

مصر بتضيع وأنتوا بدل ما بتكحلوها هتعموها
وساعتها لا هينفعكوا مرشد ولا مضل
وربنا يدى كل واحد على قد نيته

عمر said...

صحيح ... فين حضرتك من زمان .. حمدالله على السلامة ، ويارب يكون المانع خير

بصراحة .. أنا كنت معارض تماما ان احنا نشارك في اضراب 6 أبريل ، وسعدت جدا من موقف الاخوان فيه

وسعدت اكثر من موقف الاخوان من 4 مايو لأن 6 ابريل ما كانشي معروف هيبقى نظامه ايه وكان متوقع مية في المية ان هيحصل فيه تخريب ، لكن غدا الطريقة معروفه خليك في البيت فقط دون أي مظاهرات

تحياتي

روينا said...

صانعه الحريه
ازيك عامله ايه انا سالت ام يحيي
ده احنا طلعنا بلديات
اهوت ان شاء الله اشوفك قريب


اما عن الاضراب فبحمد ربنا ان قاطعنا 6ابريل وال كانو اتهمونا بالبلطجه اللى حصلت
والحمد لله ان احنا هنشارك فى 4مايو
بس هنقعد فى بيتنا
وهنلبس اسود

آفاق الحرية said...

السلام عليكم

هو طبعا قرار الجماعة بعدم المشاركة في الاضراب الاول كان صائب جدا جدا
لانه كان الاخوان هيشيلوا الليلة
لكن هنسيب قرار المشاركة في الاضراب الثاني للايام
مع انه ايجابي
لكن سيبك اهم حاجة اننا اطمئنينا علي حضرتك
تدوينات حضرتك وحشتنا كتير
تحياتي

أحمد سعيد بسيوني said...

بسم الله
كنت قد كتبت رايي في اضراب 6 ابريل على مدونتي وكتبت ان الاخوان شاركوا فيه ولكن بصورة فردية
بالنسبة لاعتصام الغد 4 مايو فكلنا معه لانه اعتصام وشعاره "البقاء في البيت" وليس فيه مظاهرات والتي من الممكن ان تخرج عن السيطرة ويحدث فيها عنف وتكسير وخلافه
الله المستعان
تحياتي

عمر المصرى said...

السلام عليكم
لعلنا نلتقى فى نقطة تحول كبيره نقطة إلتقاء حقيقة يتجمع عندها كل القوى الوطنية لهذا الشعب

الافغاني said...

ماشي يامعلم

كل الرجالة فالبيت

والريس يعيش واحنا مش مهم

الفاتح الجعفري said...

السلام عليكم ازي حضرتك اسأل الله ان تكوني بخير
هو حضرتك انا اصلا اري ماحدث ليس اضراب ولايعبر عن الاضراب بحال وكأني والله اري ان الحكومه كانت تريد من الاخوان المشاركة في اضراب 6 ابريل ولكن الله سلم
الاضراب لم يكن واضح ولم تكن له مطالب محددة
وكما قال الاستاذ الراشد
هذا اشبة بثورة الجياع والاخوان لايشاركوا في ثورة جياع
مااسهل من يثور من اجل لقمة عيش ان تلقي اليه فيصمت ولكنا نثور ونغضب وننهض من اجل منهج وعقيدة نريد غرسها في الناس تستمر علي مدي الدهور وانا عن نفسي لست ضد الاضراب بالعكس احيي الناس علي ايجابيتهم ووجود هذا المصطلح نفسه يعطي بشارات علي بداية تحرك الناس
ولااضراب 4مايو ايضا يعد اضراب سليما مالهدف منه ومامطالبه ؟
الاضراب كلمة كبيرة لم نفهمها بعد وهذا مااعتقده
-------
بس اسمحيلي ارد علي الاخ باجوجو بعد اذنك
والله حضرتك نحن لانستجدي نفع من احد الاالله عزوجل ولانريد من احد ان ينفعنا ومصر تضيع بسبب البعد عن دين الله عزوجل
وكما قال سيدنا عمر
"نحن قوم اعزنا الله بالاسلام فأن ابتغينا العزة في غيره اذلنا الله"
وكما قلت ربنا يجزي كل انسان بنيته اللهم امين اخي الكريم ,ومااراد الاخوان يوم بهذه البلاد الا الخير يكفي انهم تكلموا وقت ان سكت الناس ودعوا الي شرع الله وتحكيم كتابه في زمان لم يكن احد علي وجه الارض ينادي بهذا الاهم وقليل من من رحم ربي وعصم
والله المستعان
-----------
اسف للرد عند حضرتك ولكن اردت فقط التوضيح للاخ الكريم
جزاكم الله كل خير